2014年12月6日星期六

2014 北海道16天初秋自駕遊 - Day 8.6 湯宿くったり温泉 レイクイン


湯宿くったり温泉 レイクイン (酒店篇二)
【 禁煙 】ダブル 〜 快適シモンズベッド 〜 
一泊朝食 8800円,入湯300円

揀呢間溫泉旅館除咗價錢平之外,
係Jalan見到佢總評分有4.1,溫泉仲有4.2分。
考慮到會較晚入住,所以只訂一泊朝食,
朝食評分都有4.0,部屋就3.9。
諗住都唔差,雖然有啲隔涉,
反正都係借宿一宵,仲有溫泉浸,就呢間啦。

由帶広市開車到酒店大約1小時,
其間沿途都係摸黑行駛,
幸好轉入酒店的路有清晰路牌指示,
跟著指示方向行,好快就到酒店。

當泊好車準備入大堂時,
見到裡面好暗,入到去人影都冇,
仲以為間酒店執咗,差啲俾佢嚇親,
好彩行到去前枱就有服務員行出嚟,
辦好手續就入房,間酒店得兩層高,
我地住地面果層,行入去時見到有其他客人,
幾驚成間酒店得我地一組客 >﹏<

間房都闊落,夠放行李,仲有位食宵夜。
不過冷氣好差,開著就凍到飛起,
關咗又焗,結果要開窗,幸好外面都好靜。



喺和商市場買嘅蟹腳,
用膠袋同報紙包好,再入保溫袋,
拎到入房即刻放入雪柜,
我地浸完溫泉先慢慢拆肉整沙律。


豚肉同魚喺帶広長崎屋買嘅,
仲買咗青瓜加埋蟹肉做沙律,
呢個宵夜都算豐富喇 (≧∇≦)


一路食一路睇電視新聞,
講緊雨傘革命擴大,仲重播放摧淚彈嘅震撼場面。



講返溫泉,夜晚入去浸果時有人,
反而早上冇乜人,連男湯都一樣,
所以今次有影男湯。

先介紹男湯,一入去就係儲物櫃,
啲櫃咁長,可能係方便滑完雪嚟浸日歸嘅客。


其他設施同一般溫泉酒店差唔多



內湯有按摩池



露天池個景都唔錯,可以望到少少湖景,
但個溫泉就好唔掂,得暖水,一啲都唔熱,
咁點值4.2分呀,浸咁多次溫泉都未試過唔熱架
(冷泉除外),又要扣分 >_<




女湯又係冇人,點影都得。
裡面設施同男湯一樣。








一樣有湖景,一樣係暖水


睇真啲水有煙,但都唔夠熱。
竹棚後面就係男湯。



唔知會唔會有人行過或者扒艇仔經過呢?


浸完溫泉去食早餐,
我地間房就喺餐廳對面,走廊右邊唔記得第幾間。



原來都仲有幾組客人


長長餐枱,行個圈睇睇先


水果4款,切到細細粒


和式除咗蓮藕其他都唔啱食


沙律一定幫襯


玉子同白粥


西式啱晒胃口


好少見嘅炒麵


簥麥麵


味噌湯、白飯唔少得


蘋果粒同乳酪


UCC咖啡


生雞蛋、橙汁、納豆,仲有牛奶


唔客氣喇
早餐都算唔錯,都值4分既。


臨走影返個大堂先,正前面就係大浴場,
客房喺大堂兩側,
房間冇wifi, Lan都冇,只有大堂有wifi。
前枱個亞姐好攪笑,我check out時交低鎖匙,
佢收咗之後完全冇反應,
要我主動同佢講比錢,
佢先如夢初醒喺電腦度印張單收錢,
好彩呢幾日都習慣咗check out結帳,
如果係頭一兩日真係會就咁走咗架 :))


前枱隔離有間手信店


酒店外型都唔錯架, 我地間房喺右邊地面果層


唔記得係右邊第二間定第三間房


開車走人,後會無期。


離開新得,向富良野進發。

~ ~ ~ Index ~ ~ ~

6 則留言:

  1. 個豚肉你地生吃??

    回覆刪除
    回覆
    1. 唔係, 我地帶咗個旅行萬用煲,sabu sabu呀~

      刪除
    2. 蟹脚拆肉,利剪都有??
      全套武裝,勁 :p

      刪除
    3. Aeon店12蚊一把,好使好用:-D

      刪除
  2. 蟹肉 + 打邊爐 , 呢餐都幾特別 , 果然有創意 . ^^
    雨傘革命 連遠在日本都有報導 , 正式係揚威海外 . >_< !!
    個溫泉外觀都OK , 不過D水唔熱就爭咁D , 有部份旅館既溫泉 ,
    直情係滾水黎架 . haha ...
    酒店早餐都算OK , Check Out 時咁都得 , 笑死人 . XD

    回覆刪除
    回覆
    1. 係果邊日日都有新聞報導-_-#
      個溫泉真係唔掂,扣晒分>_<
      如果我都唔記得找數,唔知佢點追返我XD

      刪除

多謝你的留言, 如果想以電郵通知我們的回覆, 請按「通知我」,我地會儘快回覆。